'No-permit no-mass policy' sa Malacañang gihimakak

Gipanghimakak sa Malacañang nga gihigpitan nila ang simbahan pinaagi sa "no permit, no mass policy" gumikan kay usa kini ka kalapasan sa kagawasan sa katawhan.

Si Palace Spokesman Ignacio Bunye mitug-an nga gilain og sabot sa simbahan ang gipadangat nga suwat ni Presidential Security Group chief Delfion Bangit ngadto sa San Miguel Parish duol ra sa Malacañang.

Giklaro ni Bunye nga wala did-i ang pagpahigayon og misa kundili mao ang posibilidad nga magamit sa mga politikanhong kalihukan ang simbahan .

Duha na ka semana ang nakalabay pipila sa mga kritiko ug mga taga oposisyon uban sa mga paring dayag kaayong nakigkontra ni Arroyo ang gipasanginlang migamit sa takubang prayer rally diha sa Manila nga misangpot sa pagpamomba og tubig sa kapolisan human pasikretong nanulod sa gidili nga kalsada padulong sa Malacañang ang nangangkong nag-prayer rally.

Giangkon ni Bunye nga walay katungod nga but-an ang mga pari sa pagdiskurso sa ilang politikanhong panglantaw apan ang dili lang maayo mao nga pagtugot nga padiskursuhon ang mga nanimba diha sa atubangan aron magpadayag sa ilang kaugalingong panglantaw.

Dugang pa niya nga ang paghigpit sa seguridad sa simbahan sa San Miguel ug Saint Jude diha sa luyo sa Malacañang walay kalainan sa seguridad nga gipatuman sa mga hotel ug mga edipisyo.

Matud pa ni Bunye ang pag-isa sa high alert status sa palibot sa Malacañang kinutlo gikan sa desisyon sa Korte Suprema niadtong Marso 27, 1985 nga nagdeklarar sa Malacañang mga protektadong dapit.