Sugboanon para sa Ombudsman suportado

Suportado ni Mayor Tomas Osmeña ang duha ka Sugboanon nga nalakip sa mga aplikante alang sa nabakanting posisyon pagka Ombudsman.

Nasayran nga nalakip sa onse ka mga aplikante karun alang sa pagka Ombudsman mao ang Sugboanon nga si kanhi National Bureau of Investigation (NBI-7) Director Florencio Villarin ug ang laing Sugboanon nga Supreme Court Administrator nga si Cristopher Lock.

Kini human mibalibad usab si Supreme Court Chief Justice Hilario Davide Jr. nga laing usa ka Sugboanon nga maoy itudlong mosunod nga Ombudsman human unya sa iyang pag-retiro karong petsa 20 sa bulan sa Disyembre.

Nunot niini, giklaro ni Osmeña nga dako kaayo siyang pabor nga usa ka Sugboanon ang sunod nga matudlo nga Ombudsman apan nagdumili usab pagpili ang mayor kun kinsa nila ni Villarin ug Lock ang irekomendar sa maong posisyon.

Nabalaka ang mayor nga posibling dunay magmahay nila ni Villarin ug Lock kun himuon niya ang pagrekomendar og usa kanila alang sa maong posisyon.