3 sakop sa bloods nabangga, 'sikop

Tulo ka sakop sa notadong samukang gang nga Bloods nasikop dihang nabangga sa usa ka pribadong sakyanan ang ilang get-away vehicle human sila mamusil sa pundok sa mga batan-on diha sa Ayala Access Road kagahapon sa kaadlawon.

Usa sa mga suspek nga si Ritchie Canada,19, taga San Isidro, Talisay milandig sa usa ka pribadong tambalanan human mabali ang walang bukton gumikan sa pagbangga, samtang arestado usab ang duha pa niya ka kauban nga sila si Rub Martinez,19, taga Mandaue City ug Jose Marie Barquero,20, taga barangay Nangka lungsod sa Consolacion. Ang grupo matud pa sa kapolisan mga sakop sa Bloods Gang.

Ang mga sakop sa Mobile Patrol Group car 237 nga gipanguluhan ni Insp. Lourdes Engente uban nila ni PO3 Edwin Mayuela ug PO3 Jeoffrey Borinaga maoy nakaapas sa mga suspek diha na sa Mahiga Bridge sa barangay Banilad ning dakbayan human maaksidente ang mga suspek.

Si PO3 Henry Estoy sa pakighinabi sa Banat News nagkanayon nga una pa ang aksidente usa ka Joeynan Tanuron, 27, molupyo sa Ayala Access Road uban sa mga kabarkadang sila si Gibet Henedra, Ritchie Roda, Keth Ayson ug Ryan Gonzales kasamtangang nag-istambay daplin sa dalan dihang kalit nga gipamusil sa mga suspek.

Ang grupo sa mga suspek luwan sa usa ka kolor puti nga multicab nga may plakang GUG-499 ug duna pay reserbang plaka nga YAL-444 gimaneho ni Barquero. Giingong miagi sa atubangan sa mga biktima ang mga suspek ug kalit nga miliko ug mibalik sa agi dayong pamusil kanila.

Si Tanuron diha maigo sa iyang sampot ug bitiis samtang ang iyang mga kaubanan daling nakadagan.

Ang pagbuto-buto nadungog sa nagpatrolyang sila si Engente ug daling misubay sa dapit diin ang mga tawo mipahibalo kanila diin nangikyas ang mga suspek hinungdan sa nahitabong ginukdanay.

Apan diha sa may tulay sa may Country Mall sa Banilad nabangga ang mga suspek sa Honda CRV nga may plakang GSM-201 nga gimaneho ni Gina Ong ug didto na maapsi sa kapolisan ang grupo.

Nahibaw-an nga si Canada daling nakasakay og taxi nagpahatud sa tambalanan maong ang duha ra ka kauban ang naaresto nga sila si Barquero ug Martinez, diin nakuha ang duha ka kalibre .38 paltik nga may upat ka buhing bala, duha ka kalibre .22 magnum, usa niini deringer type, lima ka basiyo sa kalibre 38, ug ID sa Alpha Kappa Rho nga gipanag-iya ni Barquero ug scarf nga kolor pula nga maoy simbolo sa Bloods gang.

Pipila na ka bulan ang nakalabay usa ka ulitawo ang kalit nga gipusil sa grupo sa mga batan-ong nagluwan usab og kolor puti nga multicab diha sa may Archbishop Reyes nga gidudahang sakop sa mga gang ang luwan niini apan wala pa mailhi sa kapolisan ang mga suspek.