Si SPO2 Rizalino Aligno sa Liloan Police nga gikahinabi sa Banat News miila sa namatay nga si Jaddred Lañas, samtang nangapaso usab ang mga igsuon niini nga sila si Wilkins,14 ug Wisley,9 pulos molupyo sa maong lugar.
Matud pa ni Aligno ang maguwang sa mga biktima nga si Giselle,17, maoy miluwas sa mga bata apan ang namatay nahibilin gyud sanglit miulbo naman ang kalayo sa pagsuway unta og balik ni Giselle.
Dugang pa ni Aligno ang amahan sa mga bata tua sa Manila nag-upgrading kun training sanglit usa man kini ka seaman ug gikatakdang molarga sa gawas sa nasud karong sunod semana, samtang ang inahan sa mga bata nga si Geraldyn nianang higayona milakaw ug wala diha sa ilang balay base usab sa gibutyag ni Giselle, sigun pa sa mga polis.
Sigun pa sa mga silingan duna silay nadungog nga buto gikan sa sulod sa balay ug diha dayon nagsugod ang sunog sa sulod.
Si SFOI Salomeo Lozano ang fire investigator sa Liloan sa pakighinabi sa Banat News nagkanayon nga posibleng kandilang nabiyaang nagsiga ang hinungdan sa sunog.
Sumala pa niya usa sa mga igsuon sa mga biktima nga si Nike,15, milakaw alas dose pasado sa tungang gabii ug nangangkong iyang gipawong ang kandila sa balay sa dayon niyang lakaw.
Nagduda hinuon si Lozano nga posibleng wala mapawong ang kandila ug napupos kini ug nakadukot sa amakang bungbong, ug kadtong pagbuto nga nadunggan posibleng ang telebisyon kadto nga nahagbong.
Si Giselle matud pa ni Lozano nakadungog sa pagpanawag sa iyang uyuan diha sa gawas maong iya dayon kining gisusi ug sa paggawas niya sa sala nagdilaab na ang kalayo maong iyang gipamukaw ang mga manghod apan gumikan sa kangitngit iyang gimanduang dili una manggawas kay mangita siya og kaagian pagawas.
Apan ang duha hinuon ka batang nangaangol wala motuman ug migawas sa balay maong nangapaso kini samtang ang ilang manghod nahibilin sa lawak wala na gyud mabaliki gumikan sa kakusog sa pagdilaab.
Ang maong sunog miulbo ala 1:45 ug nakontrolar dayon sulod lang sa upat ka minutos.