Rerouting sa Nob. 1, 2 gibutyag

Ipatuman sa City Traffic Operation Management (CITOM) ang halapad nga rerouting sa mga PUJ atol sa pag-obserbar sa adlaw sa mga minatay kun kalag-kalag karong petsa uno ug dos sa Nobiyembre adlaw'ng Martes ug Miyerkules sunod semana.

Sa gipagawas nga press release sa Traffic Group ug Citom pinaagi ni Supt. Julius Cesar Gornez gipahibalo niini nga apektado sa ipatumang re-routing ang tanang mga rota sa PUJ nga anha moagi sa nagkalainlaing mga sam-ang dinhi sa dakbayan atol sa adlaw sa kalag-kalag.

Sugod sa petsa uno sa buntag ang tanang mga PUJ gidid-an nang maka-agi sa Dela Victoria Street ug Sabellano Road paingon sa Pardo Cemetery gumikan kay ang Lusimba ug Dela Victoria St. ang himoon kining parking area sa mga sakyanan.

Hinuon magpabilin sa naandan ang rota sa mga PUJ nga anha moagi sa V. Rama Avenue lahos sa sementeryo sa Calamba gawas lang nga gidid-an kining maka-parking duol sa maong sam-ang aron paglikay sa suliran sa trapiko.

Samtang ang tanang PUJ did-an kining makasulod sa Katipunan ug adto kini paagion sa Balaga St. paghatag og higayun sa mga tawo nga moduaw sa lubong diha sa sementeryo sa Labangon.

Samtang ang tanang sakyanan gikan sa downtown area gidid-an kining makasulod sa Talamban Proper ug adto kini paagion sa may Borbajo St. aron dili mahasol ang mga tawong managkot sa lubong diha sa sementeryo sa Talamban.

Ang labing dako nga rerouting mahitabo sa mga rota sa PUJ nga anha moagi sa Carreta Cemetery, Dona Pepang, Queen City Garden ug Chinese Cemetery.

Tungod niini ang tanang mga PUJ gikan sa Mabolo gawas sa Mandaue PUJ (21B ug 22B) ang mo-left turn kini sa Juan Luna Avenue ug mo-right turn sa T. Padilla Extension, left turn sa MJ Cuenco Avenue ngadto na sa downtown area.

Samtang ang mga PUJ gikan sa Consolacion, Lilo-an, Compostela, Danao, Carmen ug ang gikan sa Mepza Lapu-Lapu City anha paagion sa Urot St., left turn sa Kaoshiung st o Cabahug St. dayung right turn sa S. Osmeña Avenue,right turn sa 13th St., right turn sa Benedicto St. lahos na ngadto sa North PUJ Terminal ug lahos sa Gen. Maxilom Avenue Extension, left turn sa S. Osmeña dayun na sa naandang rota niini.

Samtang ang mga sakyanan gikan sa habagatang bahin anha paagion sa Benedicto St. lahos sa JC Veyra st., right turn sa Gen. Maxilom Extension, left turn sa S. Osmeña ngadto na sa naandang rota niini sa SM ug North Bus Terminal.

Ang mga sakyanan gikan sa Urgello ug Private anha paagion sa Benedicto St, lahos sa pier area, right turn sa Gen. Maxilom Extn, right turn sa S. Osmeña balik sa naandang rota.

Ang mga PUJ gikan sa South Bus Terminal anha paagion sa S. Osmeña Avenue, left turn sa T. Padilla Extension, right turn sa Benedicto St., right turn sa Gen. Maxilom Avenue Extension, right turn sa S. Osmeña Avenue, right turn sa T. Padilla Extension, left turn sa MJ Cuenco Avenue ngadto na sa na-andang rota.

Giawhag sa Citom ang publiko pagsunod sa maong ipatuman nga rerouting atol sa kalagkalag aron maminusan ang suliran sa trapiko sa maong adlaw.