Traffic enforcer gituok sa drayber

Gipasakaan og kasong direct assault ang usa ka drayber sa traysikol kinsa mituok sa traffic enforcer niadtong Martes sa buntag diha sa barangay Tabunok dakbayan sa Talisay.

Ang biktima mao si Junrey Naingue traffic enforcer sa Talisay kinsa nadestino diha sa atubangan sa Saint Joseph Parish sa nahisgutang barangay.

Ang suspetsado mao si Percy Carian hingkod ang panuigon taga barangay Lipata lungsod sa Minglanilla drayber sa traysikol nga nagtangag sa plakang GZ-1958 nga magbiyahian sa Talisay.

Matud pa ni PO3 Edwin Alvarado sa pakighinabi sa Banat News nga gipahunong ni Naingue ang suspetsado tungod kay nagpasakay kini og pasahero diha sa dunay sign nga "no stopping".

Gipangayo ni Naingue ang lisensiya ni Carian apan nagdumili kini sa paghatag.

Hinungdan nga ang yawe sa traysikol gikuha ni Naingue sa paniguro nga dili kini makadagan nga dili mahatag.

Mitawag si Naingue ngadto sa traffic division sa Tabunok para mangayo og police assistance apan gikalitan kini og tuok sa suspetsado diha sa likod og giilog pagbalik ang yawe sa iyang traysikol.

Hingundan nga nahitabo gyud ang linayogay sa duha og gibuwag na kini sa laing mga traffic enforcer nga naka-duty niadtong adlawa.

Si Carian natingkagol karon diha sa Talisay detention cell sa barangay Lawaan.