Giila ang lalaki mao si Godfredo Rodney Como,26, ulitawo ug molupyo sa Sitio Kawit sa naasoy'ng barangay kinsa giingong tibuok adlaw'ng Martes gipangita sa iyang kapuyo apan wala hikaplagi.
Sumala pa sa imbestigasyon ni SPO2 Alex Dacua nga dunay usa ka residente nga mipahibalo sa gwardiyang si Dario Novio nga dunay tawong iyang nakit-ang misulod niadtong Martes sa tungang gabii ug wala pa makagawas sukad niadto.
Si Dacua nagkanayon nga daling gisusi ni Novio ang palibot ug didto nakit-an niini si Como nga nagpilit sa maong higanteng capacitor ug wala nay kinabuhi ug daghag sunog kun paso sa nagkadaiyang parte sa iyang kalawasan.
Ang cadet engineer sa VECO nga si Eric Laborte ug Novio nakakita og usa ka copper wire connector diha tupad sa lawas ni Como. Giingong mahal kun paliton ang maong connector sanglit bronse kini. Apan daghan ang nagtuong ipatimbang lang kini sa mga junkshop kun dili gikan sa hardware.
Nagduda hinuon si Dacu a nga posibleng managkunsabo kadtong tawong mipahibalo kang Novio sanglit nakapahibulong kun nganong nakahibalo kini nga misulod si Como diha ug hangtud nianang gabhiuna kun wala pa niya pahibaw-a ang gwardiya dili mahibaw-an nga patay na diay kini diha sa sulod.
Wala hinuon makatino si Dacua kun unsay tuyo sa biktima diha sa maong dapit apan giingong diha kini miagi sa ventilator exhaust pinaagi sa paglangkat sa metal screen.
Nasuta usab sa imbestigasyon ni Dacua nga kanunay nang pasekretong mosulod sa maong compound si Como.