11 balay sa Quiot gilamoy sa kalayo

Onse ka balay ug usa ka bodega gilamoy sa kalayo nga miulbo diha sa barangay Quiot- ning dakbayan kagahapon sa udto nga milanat og pito ka minutos una nakontrolar.

Ang maong sunog midanyos og gibana-banang P700 mil ug miangol kang Antonio Regner, hingkod ang panuigon samtang iyang giluwas ang anak sa iyang igsuon nga 3 anyos ingon man ang iyang anak nga 2 anyos.

Sumala pa ni SFO2 Felix Romero ang fire investigator sa pakighinabi sa Banat News nga nadawat nila ang alarma 1:03 ug nakontrolar kini 1:07 bisan nakasinati sila og kalisod sa kakuhaan og tubig sa duol sanglit ang fire hydrants sa maong dapit 400 ka metros gikan sa fire scene.

Ang bodega sa Isabelo Enterprises nga gipanag-iya ni Villanueva ug balay ni Makalinao gidukutan usab sa kalayo apan nadali og pawong sa kabomberuhan.

Tulo ka posibleng hinungdan sa maong sunog ang gisubay karon ni SFO2 Romero kini mao ang posibilidad nga faulty wirings, katol o ba kaha kandila ug ang posibilidad nga dunay batang nagduwa sa gipuy-an ni Rodrigo Regner nga diin ang iya rang anak ang nahibilin.

Sumala pa sa naangol nga nakit-an nalang niyang nag-aso ang ikaduhang andana sa ilang balay diin magpuyo ang iyang igsuong si Rodrigo maong iyang gidali og saka ang anak niini sa taas aron kini luwason apan sa paghimo niini napaso siya gumikan sa pagkusog sa kalayo.