Pasyente Naghikog

Patay na nga napalgan sa duha ka staff nurse sulod sa pansayan sa Mandaue City Hospital ang usa ka tigulang nga pasyenteng gipaninglan og P9 mil sa ospital human maghikog pinaagi sa paghikot og cord sa iyang liog ug ang pikas tumoy ngadto sa tubo sa shower.

Si Francisco Palomares, 69-anyos, taga Andres Soriano Avenue, barangay Centro, Mandaue, wala nay panimuot nga nakit-an sa duha ka nars sa naasoy'ng tambalanan niadtong miaging buntag.

Sa imbestigasyon ni SPO1 Roberto Peteros sa Centro Police Station, si Palomares nakit-an nilang Gliza Martinez ug Norman Rabaya nga nagbitay nang walay kinabuhi sulod sa pansayan.

Si Dra. Dominga Obenza, hospital chief, mitug-an sa BANAT NEWS nga si Palomares pasyente sa male surgical ward sa naasoy'ng ospital human ma-admit tungod sa aksidente sa sakyanan.

Matud ni Obenza nga si Dr. Manuel Lumapas nga usa ka pribadong doktor sa orthopaedic maoy nag-atiman kang Palomares.

Sumala pa ni Obenza nga usa ka kaubang pasyente ni Palomares mogamit unta sa pansayan, apan nahibulong kini tungod sa kadugay nang na-lock samtang walay nadunggang kisaw sa sulod niini.

Ang pasyente nanawag sa duha ka staff nurse nga maoy mipugos og abli sa pansayan ug nakit-an si Palomares nga nagbitay na.

Gisulayan og luwas si Palomares, apan wala na gyud kini matabang.

Si Obenza miingon nga gitugotan na untang makauli si Palomares ug nakahikay na kini sa iyang mga papeles. Gipaninglan siya og P9 mil.

Matud niya mahimong makapangayo si Palomares og tabang sa mga social worker sa ospital aron iduso kini ngadto sa Philippine Charity Sweepstakes Office alang sa hinabang pinansiyal.

Walay nakitang sakit nga depresyon o deperensiya sa pangisip si Obenza ngadto kang Palomares. - Uban sa report ni Romeo T. Limpangog