Bag-ong alarm system gipaila

Ipatuman na ang labing bag-o ug modernong alarm system nga mo-alkontra sa mga dautang binuhatan sama sa nahitabung sunod sunod nga pagpanulis dinhi sa dakbayan sa Sugbo.

Ang maong modernong kahimanan nga gigastuhan og P2 milyones sa siyudad gitawag kini og "Burglar Alarm System" gipaabot nga maoy sulbad unya sa mga sunod sunod nga problema sa pagpanulis og bangko ug uban pang establisamento.

Atol sa press conference kagahapon sa udto gipahibalo ni Osmeña nga gi-asikaso na ang pag-tap ning maong sistema karun human pormal na kining na-bidding ug naduso na usab sa konseho ang ordinansahon kabahin niini nga nagpaabot nalang sa approval.

Matud ni Osmeña bugtong himuon sa mga nanag-iya og establisamento ilabi na ang mga bangko, pawnshop ug lending firm ang magpa-subscribe lang kini sa City Hall aron matauran sa maong sistema.

Ubos ning maong sistema kadtong mga establisamento nga magpataud niini obligadong magbayad og P2 mil ang bulan sa siyudad aron mamahimong on-line ang cellphone niini sa City Hall nga nakakonektar sa kapolisan.

Sa higayun nga dunay motumaw nga alarma marehistro dayon sa City Hall ang lugar ug ang establisamento nga nahitabu-an sa alarma pinaagi sa pag-push lang sa button sa maong cellphone aron mao dayon kini rombohon sa mga moresponding sakop sa kapolisan.

Karung pipila ka adlaw gipaabot nga manawat na og aplikasyon ang City Hall alang niadtong gustong magpa-subscribe ning maong modernong alarm system.

Ang ikaduha nga klase ning maong alarm system mao kadtong paghatag ug higayun sa mga ordinaryong residensya o ba kaha mga ginagmay'ng sarisari store nga pabayron lang ug tag P300 ngadto sa P400 ang bulan aron maka-online na ning maong sistema.