2% sa mo-broker sa SRP

Mohatag og dos porsyento nga komisyon ang kagamhanan sa siyudad sa Sugbo niadtong mga ahente nga makabaligya sa bakanting luna diha sa South Reclamation Project kun SRP karon nga hingpit na kining na-isyuhan og titulo.

Kini maoy gituki atol sa pagpakigtagbo sa mga abogado sa siyudad pinangulohan ni City Attorney Rodolfo Golez ug Konsehal Jose Daluz ngadto kang Mayor Tomas Osmeña kagahapon sa buntag.

Hinuon gibalibaran lang una ni Osmeña ang tanyag sa maong mga manlalaban kun mangayo ba kini og blanket authority sa konseho kabahin sa pagbaligya sa maong luna sa SRP gumikan kay alang niya pagkakarun dili pa kini maoy labing gikinahanglan.

Matud ni Osmeña dunay ubang mga magpapatigayon nga gusto og joint venture samtang ang uban nagtinguha nga mo-abang lang una og luna nga maoy katukoran sa ilang pamatigayon diha sa maong reclamation project.

Bugtong prayoridad sa mayor mao ang pagpangayo og pagtugot sa konseho nga mahatagan og dos porsiyento nga komisyon kadtong mga ahente nga makabaligya sa SRP aron madasig kini sa pagpangita og mga negosyante nga mobubo sa ilang puhonan dinhi sa Sugbo.

Hinuon giklaro sa mayor nga kadtong mga magpapatigayon nga makakuha og luna diha sa SRP nga wala mag-agi og ahente ang dos porsyento nga komisyon gitinguha sa mayor nga mapunta ngadto sa UNICEF.