Mitulis sa W.U. ug usa kooperatiba usa ra-Labra

Dako ang pagtuo sa kapolisan nga ang mitulis sa Western Union Money Transfer diha sa Rain Tree Mall niadtong Sabado sa hapon mao ra usab ang mitulis sa usa ka kooperatiba diha sa dalan Junquera duha na ka semana ang nakalabay.

Si Supt. Pablo Labra mitug-an nga sa pagkakaron wala pa gyuy matumbok nga suspek sanglit ang mga kawani sa Western Union walay natumbok sa mga hulagway nga gipakita ngadto kanila sa kapolisan gikan sa mga sakop sa grupo ni Rey Torres.

Apan si Labra mibutyag nga duna pa siyay laing mga picture ug gilaraw niyang ipakita sa mga kawani sa Western Union kining mga hulagway mga sakop sa banggiitan usab nga lider sa mga tulisan nga si Danny Limotan maoy ipakita sa mga kawani.

Nagtuo si Labra nga ang miigo sa usa ka kooperatiba diin dunay usa sa mga tulisan ang naangol human nga aksidenteng mibuto ang armas niini ug naunay sa bitiis niini.

Sama sa nahitabo sa Western Union niadtong Sabado dunay usa nga gituohang ginerbiyos ang aksidenteng nakablitan ang armas maayo nalang nga wala niini maunay ang kaugalingon o ba kaha makaigo og ubang tawo.

Nakuha sa mga tulisan ang P800,000 gikan sa kahera ug sa kaha sa maong buhatan. Duna nay tulo ka branches sa Western Union ang naigo sa mga tulisan sulod lang tuiga duha niini sa Mandaue City ug sa Lapulapu City .