Car stereo sa mga 'sikad ug traysikol idili na

Giaprobahan sa unang pagbasa niadtong Huwebes sa konseho sa Talisay ang ordinansa sa pagdili og gamit og mga stereo o musical instrument sa mga traysikol ug traysikad nga nagbiyahe sa dakbayan.

Base sa ordinansa numero 2005-32 nga gidid-an ang tanang traysikad og traysikol sa paggamit sa bisan unsa nga musical instrument sama sa car stereo. Radyo ug loud speaker.

Ang makalapas sa maong ordinansa pamultahon og P500.00 o walo ka oras nga civic duty sa unang kalapasan, P1,000.00 o 16 ka oras nga civic duty sa ika-duhang kalapasan, P1,500.00 o pagkabilanggo sulod sa tulo ka adlaw sa ika-tulong kalapasan ug P1,500.00 ug duha ka adlaw nga pagkapriso sa ika-upat nga kalapasan.

Diin sa ika-lima nga sunod-sunod nga kalapasan rebokasyon sa permit sa pag-operate ug kompisakahon ang musical instrument.

Ang nahisgutang resolusyon nga gipangamahan ni Bise Mayor Aberdovey Belleza gi-refer ngadto sa committee on laws sa dugang pagtuon.