2 'pusher' nasikop

Nakuha gayod sa lit-ag sa kapolisan ang duha ka "banggiitang tigpayuhot" og shabu sa sitio Pacubas sa barangay Pusok, siyudad sa Lapu-Lapu sanglit nadakpan man kini sa buy bust operation nga gihimo.

Ang mga suspetsado nga nadakpan mao sila si Alberto Babao ug Gerson Campanado, pulos mga hingkod ang panuigon ug mga ulitawo nga nanimuyo sa maong dapit.

Nadakpan kini sa team nga gipangulohan ni PO2 Jomar Ybanez sa Criminal Intelligence and Investigation Service (CIIS) sa kapolisan sa maong dakbayan nga naghimo sa ilang buy bust operation.

Sa spot report nga gisumitir nila ni PO2 Ybanez ngadto kang Superintendent Louie Oppus maoy nahibaw-an nga ang duha ka mga dinakpan ang nasakmitan kini og upat ka pakete sa shabu atol sa pagkasikop niini.

Kini ang gihimoan gilayon og PNP Crime laboratory sa pagsuta kon positibo ba gayod nga shabu ang nasakmit nila ni PO2 Ybanez nga makapalig-on sa kaso nga kalapasan sa Republic Act 9165 kun Comprehensive Dangerous Drug Act of 2002.