Biktima sa tulis nisukol, gitipi

Patay ang usa ka 41-anyos nga lalaki human kini pusila sa duha ka wala mailhi nga mga tulisan kinsa mitulis kaniya atol sa besperas sa pista sa dakbayan sa Talisay. Kini nahitabo niadtong Biyernes sa gabii diha sa barangay Lawaan I sa maong siyudad.

Ang biktima mao si Reynaldo Nepomuceno, residente sa A. Lopez Street niining dakbayan. Dali kini nga gidala diha sa Talisay District Hospital apan gibalhin kini diha sa Cebu Doctors Hospital niining dakbayan.

Apan pagka-alas 11:50 sa gabii sa maong adlaw nakabsan gyud kini sa iyang kinabuhi.

Matud pa ni Marie Gabutan kinsa kuyog ni Nepomuceno dihang nahitabo ang insidente nga mitabok sila sa karsada diin paingon sila sa Cebu City.

Duha ka wala mailhi nga lalaki sakay og choppy nga motorsiklo nga nagtangag sa plakang GF-7406 ang mition kanila og pusil diin gimandoan sila nga pahunongon.

Nanaog gikan sa motorsiklo ang usa sa mga suspetsado ug mipugos sa pagkuha sa cellphone, kuwarta ug pitaka ni Nepomuceno ug Gabutan.

Apan si Nepomuceno nagdumili sa paghatag sa iyang pitaka ngadto sa tulisan hinungdan nga nasuko kini ug gipusil ang biktima. Ang kapolisan sa Talisay mipahigayon of follow-up nga imbestigasyon sa maong insidente.