Kinhason vendors sa Pasil mitiyabaw

Mitiyabaw ang mga manindahay og kinhason apil na ang mga manindahay og tahong diha sa Pasil Fish Market niining direktiba sa Bureau of Fisheries and Aquatic Resources (BFAR-7) nga nag-ban sa pagbaligya og kinhason gumikan sa giingong red tide.

Mitiyabaw ang mga manindahay og kinhason apil na ang mga manindahay og tahong diha sa Pasil Fish Market niining direktiba sa Bureau of Fisheries and Aquatic Resources (BFAR-7) nga nag-ban sa pagbaligya og kinhason gumikan sa giingong red tide.

Dili mominos 20 ka mga manindahay og kinhason diha sa Pasil ang nagpanon nga midangop ngadto sa buhatan ni acting Market Administrator Elpedio dela Victoria Jr. aron mo-apelar sa maong direktiba nga giluwatan sa BFAR ug ipaklaro niini ang mga kinhason nga gi-ban.

Apan gipasabot ni dela Victoria ang maong mga manindahay nga bugtong ang tahong lang maoy gi-ban sa BFAR niadto pang miaging mga semana ilabi na gyud kadtong naggikan sa Samar nga maoy gitumbok nga apektado sa red tide.

Hinuon gitambagan usab ni de la Victoria ang maong mga manindahay nga mo-secure kini og auxillary invoice ngadto sa mga lugar nga gigikanan sa ilang mga kinompra nga kinhason aron pagseguro nga luwas kining kan-on sa publiko ug apil na ang pagpangayo og inspection report gikan sa BFAR-7.

Nunot niini, giawhag ni dela Victoria ang tindera og tahong nga taga lungsod sa Argao, Cebu nga maoy mibutyag nga gikan sa Pasil ang litob nga iyang kinompra nga maoy nakahilo sa pipila ka mga molupyo sa maong lungsod.

Kini aron mapahigayon kini og pakisusi sa Market Authority kun diin maggikan ang maong kinhason nga napalit sa maong manindahay ug nakahilo sa mga biktima.

Nagpaabot pa ang Market Authority sa resulta sa gipahigayong imbestigasiyon sa BFAR-7 kabahin sa pagkahilo sa maong mga molupyo sa Argao aron ang resulta sa maong imbestigasyon maoy himuong basehanan sa ilang paghimo ug mga tukmang lakang nga gitumong aron paghatag og proteksiyon aron maseguro nga limpyo og luwas kan-on ang mga kinhason nga ibaligya diha sa pasil.