Asset Giagtang: l sumbohan sa .45 gipalusot lang sa gintang sa kawayan sa balay

Usa ka giingong asset sa kapolisan giagtang og pusil atubangan sa kan-anan niini diha sa kusina sa ilang balay sa sudlunong bahin sa White Road barangay Inayawan kagahapon sa kadlawon.

Ang maong dapit dili layo sa gikamatyan usab sa gidudahang biktima sa vigilante nga gitumba duha na ka adlaw ang nakalabay.

Ang naagtang giilang si Ricky Mendoza, 48, ug usa ka sapatero, si PO3 Henry Estoy nga gikahinabi sa Banat News mitug-an nga ila pa karong gisusi ngadto sa buhatan sa Regioanal Intelligence and Investigation Division kabahin sa taho nga "police asset" ang biktima.

Segun pa sa imbestigasyon nila ni SPO2 Jay Yballe, PO2 Dario Manatad ug PO3 Estoy nga mao pay pag-abot sa biktima gikan nakig-inom diha sa gawas ug padulong na unta kini mokaon sa iyang panihapon uban sa kapuyo niin nga si Lolita Santillan dihang dunay kalit nga mipusil sa biktima.

Matud pa ni Santillan nga posibleng gipalusot lang diha sa gintang sa lipak sa kawayan nga ilang bungbong sa kusina ang sumbohan sa kalibre 45 pistola sa wala pa mailhing mamumuno.

Usa ka bala diha sa agtang ang mitapos sa kinabuhi ni Mendoza kinsa wala makabawos sa iyang kalibre .357 rebolber nga may unom ka buhing bala atol sa insidente.

Dugang pa ni Santillan ngadto sa kapolisan nga niadtong milabay'ng semana dihay duha ka tawong gibadlong ni Mendoza gani iya pa kining gihadlok pinaagi sa pagpasalba sa iyang armas.

Ang maong duha ka wala mailhing tawo gibadlong sa biktima gumikan kay anha nangatulog sa sikbit nga abandonadong balay nga gibantayan niini.

Sa sayo pa nianang gabii sa pagpatay kang Mendoza dunay nakakita sa usa sa duha ka tawong gibadlong nga nagbahas-bahas sa maong dapit.