Makita sa Bohol: Labing dako nga bitin sa RP

Gawas sa Chocolate Hills, Calamay, Tarsier ug uban pang mga maanindot ug makasaysayanon kaayong talan-awon sama sa Loboc River, Panglao Island, Baclayon Church ug Sandugo Shrine, lain pang ikapasigarbo sa probinsiya sa Bohol mao si PRONY, ang labing dakong bitin nga buhi karon sa Pilipinas.

Ang python nga si Prony, nga mag-nuybe anyos pa lamang karong Oktubre 21, dunay gitas-on nga 23 ka tiil kon siyete metros, ang iyang lawas dunay gilapdon nga 30 ka pulgada ug duna kini gibug-aton nga 200 kilos.

Inabagan sa Animal Kingdom Foundation, Inc., ang pamilya Salibay maoy nagbuhi ni Prony nga hugopan kanunay sa mga turista, lokal man o langyaw, didto sa Upper Sta. Fe sa lungsod sa Alburquerque, Bohol.

Ang maong makapaisag balahibo nga mananap ginganlan og Prony gumikan kay ang nakadakop kaniya niadtong tuig 1996 mao man si Sofronio Salibay.

Matud pa sa pamilya nga Salibay nga sukwahi sa laing mga bitin, si Prony dili mokaon og manok mao nang iring maoy ilang ilawog sa dihang bag-o pa nilang nadakpan si Prony nga niadtong tungora lima pa ka kilo ang gibug-aton ug duna pay gitas-on nga lima ka tiil.

Sa dihang nagkadako na si Prony, iro na maoy ilang ipakaon niini tagurha matag bulan. Ning tuiga, baboy na maoy kinaham nga putahi ni Prony. Apan dili basta-basta ang pagpakaon sa maong bitin kay dili niini tukbon ang baboy kon iyang makita nga gamay ra kaayo kini alang kaniya.

"Ang kunsomo ni Prony mga 40 hangtud sa 50 kilos gyud nga baboy matag bulan. Kon kulang gani, mag-reserba ming daan og usa ka kanding aron ifollow-up sa iyang kan-on," matud pa ni Jingjing Salibay.

Gibutyag sab sa banayng Salibay nga luoran kaayo si Prony gumikan kay dili kini moduol kanila sa higayon nga makamatikod kini nga molakaw sila nga dili mananghid sa bitin.

"Mao nang kaming tanan basta molakaw mananghid gyud mi kay luoran kaayo ning bitina. Mailhan na namo siya nga mangluod kay dili man magpahikap namo kon amo duolon," matud pa ni Jingjing.

Nagkanayon ang pamilyang Salibay nga kon maka-abot pa og 40 anyos si Prony, posible niining papason ang Guinness world record alang sa pinakataas nga bitin sa tibuok kalibutan.

Sa kasamtangan, nahitala sa Guinness Book of World Records isip labing taas nga bitin sa kalibutan mao ang Python reticulates nga makit-an sa Celebes, Indonesia ug Pilipinas. Ang maong bitin dunay gitas-on nga 10 metros kon 32 ka tiil ug 9.5 ka pulgada.

Dili pa dugay, mga molupyo sa Curugsewu village didto sa Java, Indonesia ang mipahibawo nga nakadakop sila og 49 ka tiil nga bitin nga dunay gibug-aton 990 ka libras.