Kapitan sa Apas nasampulan

Gipasakaan og kasong kriminal sa Cebu City Prosecutors Office ang barangay kapitan sa Apas gumikan sa iyang paghugawhugaw diha sa iyang barangay nga kalapasan sa Akta Republika R.A. 9003 kun Solid Waste Management Act.

Ang Cebu City Solid Waste Management Board pinaagi sa Cebu Environmental Sanitation Enforcement Team (CESET) maoy misang-at og kasong kriminal batok kang Apas barangay captain Clemente Rosales gumikan sa maong kalapasan.

Subay sa gipagawas nga taho gikan sa City Information Office sa Cebu City Hall nadakpan si Rosales niadtong petsa 17 sa miaging bulan sa Agosto sa usa ka deputized enforcer nga maoy nangulo sa CESET monitoring team.

Kini gumikan sa kapakyas sa kapitan pag-segregate sa mga basura niining malata ug dili malata subay sa pagpatuman sa maong balaod sa siyudad nga "No Segregation, No Collection of Garbage Policy" nga gisugdan sa pagpatuman niadtong Hulyo uno.

Si Konsehal Nestor Archival, tsirman sa Committee on Environment sa konseho sa dakbayan maoy nangulo sa implementasiyon ning maong programa nga gipasubay sa na-aprobahang City Ordinance 2031.

Gikan sa pagpatuman ning maong ordinansa niadtong Hulyo hangtud karun duna nay 3,968 ka mga indibidwal ang na-isyuhan og mga citation ticket human masakpi nga nakalapas sa maong balaod.

Mokabat sa 560 niini ang gitugotang mobayad og P500 nga compromise fee sa multahan niini nga usa ka P1,000 ug pagkabilango bali ug usa ka bulan nga dili molapas sa unom ka bulan.

Dunay 594 ang na-isyuhan og notisya nga gipahimangnuan sa mao nilang kalapasan ug 217 ang pormal nang napasakaan og kaso sa korte ug duna pay 3,191 ka mga nadakpang malapason ang gitakda nang pasakaan og kaso sa korte.