Balay miulbo tungod sa pyro dos anyos 'paig

Napaig ang usa ka dos anyos nga bata samtang namatay usab sa tambalanan kagahapon sa buntag gumikan sa grabeng pagkapaso ang 18- anyos nga ig-agaw'ng dalaga niini human miulbo ang ilang balay samtang namutos og mga pabuto ang inahan sa bata diha sa Lapu-Lapu nga miangol usab og duha pa ka tawo.

Ang namatay mao si Jay-Ar Bontilao, 2 anyos, nag-inusarang anak sa grabeng nangaangol nga magtiayong sila si Jay ug Maryjane pulos 26 anyos. Namatay usab kagahapon diha sa Vicente Sotto Memorial Medical Center si Mariecris Berdon,18, pag-umangkon sa managtiayon gumikan sa grabeng paso sa lawas niini samtang grabe usab ang lain pa nilang pag-umangkon nga si Neneth Mingo,18.

Ang aksidente diha mahitabo sa Sitio Radar barangay Babag 2 sa naasoy'ng dakbayan niadtong Martes sa gabii samtang si Maryjane, Berdon ug Mingo namutos og mga kwitis para ibaligya pagkasunod adlaw.

Matud pa sa igsuon sa bana ni Maryjane nga si Elma Bontilao sa pakighinabi sa mga tigbalita kagahapon nga dunay tulo ka mga bisitang lalaki nga sila si Noel Racoma (paryente ra), Jake Molo ug usa ka naila lang sa ngalan nga Danny.

Samtang namutos ang mga biktima sa pabuto diha say nagsigarilyo sa tulo ka bisita apan wala pa matino karon kun si kinsa ug gidudahang maoy aksidenteng nakaduslit sa mitsa o ba kaha pulborang nausik nga nakaingon sa aksidente.

Kasamtangang natulog ang bana ni Maryjane ug anak niining si Jay-ar dihang nagbutobuto ug misilaob ang amakang bungbong sa payag hinungdan nga nagkatibulaag ang mga biktima.

Gumikan sa kakalit sa hitabo nabiyaan ang dos anyos nga bata ug napaig uban sa naugdaw nga payag samtang daling gidala ang mga nangaangol ngadto sa tambalanan diin gibana-banang lima ka oras ang milabay nakabsan usab sa kinabuhi si Berdon.

Sumala pa ni Elma nga walay nasakitan sa tulo ka bisita sanglit mitabang pa gani kini sa mga biktima nga makagawas sa balay.

Si FESSAG chief, Supt. Lyndon Lawas sa unang pakighinabi sa media mibutyag nga gidid-an na ang mga mamuhatay og pabuto diha sa Lapu-Lapu nga maka-manufacture gumikan kay wala sila makapasar sa mga rekisitos ilabi na sa safety measures ug gumikan usab sa mga reklamong dunay mga bata nga gipatabang sa ilang mga ginikanan sa paghimo niini.

Sa nasayran duna ray tulo ka mga tiggama sa pabuto ang gitugutan sa Kampo Crame nga maka-manufacture og mga pabuto. Apan sa habig sa mga mamuhatay og pabuto diha sa Babag 2 wala nila kini ikahimuot sanglit walay alternatibong pangabuhian ang gihulip sa gidili nga trabaho kanila .

Gawas sa duha ka mga nakalas ug nangaangol gibana-banang P30 mil ang kantidad sa balay ug mga kabtangan nga naugdaw atol sa aksidente.