NPA posibleng maoy mi-ambus

Grupo sa New Peoples Army maoy usa sa mga gidudahan sa kapolisan nga dunay kalambigitan sa pagpamanhig sa lider sa unyon nga si Anthony Cuizon diha sa barangay Uling Naga niadtong Lunes.

Si Cebu Provincial Police Office chief, Supt. Vicente Loot mibutyag sa mga sakop sa media kagahapon nga dunay posibilidad nga mga sakop sa NPA ang mitira kang Cuizon.

Nahibaw-an sa kapolisan atol sa pagsusi nga dunay mga miyembro sa karibal nga unyon nga gikabangi sa Panaghugpong sa mga Mamumuo sa Atlas (grupo ni Cuizon) nga dunay mga paryenteng naa sa "regular force" sa armadong pundok sa NPA.

"Ang ubang mga nakontra niya sa ribal nga grupo naay mga paryente nga mga NPA regulars, dili nato ni ikasalikway remember this is a labor problem," sumala pa ni Loot.

Apan wala pa matino ni Loot kun nagpalaban ba o ba kaha kabubut-on aron pagsimpatiya lang ang gihimo sa mga gidudahan karong NPA sa pagbanhig kang Cuizon.

Si Cuizon uban sa iyang inahan ug duha ka apo luwan sa awto padulong sa Lutupan gibanhigan sa duha ka mga lalaking nagtaptap sa nawong luwan sa usa ka motorsiklo, apan swerteng naluwas ang biktima human sa duha ka buto dihang natagak ang magazine sa armalite nga gigamit sa mga suspek.

Ang kapolisan mitutok sa anggulong dunay kalambigitan sa problema sa mga mamumuo diha sa Atlas Consolidated Mining Development Corporation diin natunga sa mga paksyon ang mga unyon sa mga kanhi trabahante niini gumikan sa wala pagkasinabtanay sa kung unsay angayang buhaton.

Sa labing ulahing kagubot tali sa mga nagribal nga mga unyon si Cuizon gipasakaan og kaso sa grupo nila ni Marcos Billones gumikan sa pasangil nga nangharas ug nanghulga kini sa iyang mga sakop pipila ka adlaw una pa ang pagpamanhig. Samtang si Billones usab nadakpan gumikan sa giingong paghupot og dili lisensyadong armas nga maoy nakapasamot sa kainit sa duha ka grupo.