Pang-haras ni Cuizon sa Atlas susihon - polis

Anggulo sa panagbangi sa ribal nga unyon sa mga mamumuo diha sa Atlas Consolidated Mining and Development Corporation maoy usa sa bug-at nga subayonong anggulo sa kapolisan kalabot sa pagpamanhig kang Antonio Cuizon niadtong milabay'ng Lunes sa buntag.

Apan gawas sa maong anggulo si Supt. Leodegario Acebedo, hepe sa Toledo Police Station nga maoy gitahasang mangulo sa imbestigasyon, mitug-an sa Banat News nga subayon usab ang ubang makitang dunay posibilidad nga nakaingon sa insidente.

Si Cuizon kinsa luwan sa usa ka awto uban sa iyang inahan ug duha ka apo padulong unta sa Toledo City dihang gibanhigan sa duha ka mga lalaking luwan sa motorsiklo apan nasuwertihan ang biktima kay natagak ang magazine sa armalite sa mga suspek ug mipalyar usab ang makina sa motorsiklo.

Nasuta nga si Cuizon nalambigit sa kagubot sa laing grupo sa unyon niadtong nakalabay'ng semana diin siya gireklamong nangharas, nangguba, nanion ug namahad sa mga miyembro sa grupo ni Marcos Billones kinsa lider usab sa laing unyon diha sa Atlas.

"We are exploring all possibilities to establish the motive, but we are not just focusing on that angle kay wala pa man nato maka-istorya si Cuizon," sumala pa ni Acebedo nga mipasabot usab nga subayon usab ang lima ka insidenteng gikalambigitan sa biktima sulod lang sa usa ka adlaw niadtong nakalabay'ng semana.

Dugang pa niya nga dili kaayo bug-at ang mga pamahayag sa mga testigos diha sa crime scene gumikan kay pulos nagtaptap ug nag-helmet ang ilang paghulagway sa mga suspek ug wala pay mitumaw nga nakakitang walay gisuot nga tabon ang mga namusil sa wala pa ang hitabo.

Lakip sa planong kuhaan og pamahayag mao ang mga kauban ni Cuizon diha sa sakyanan atol sa insidente ug mga tawong nakaila sa biktima diha sa Lutopan, Toledo City.