Hapit tanang Talisaynon ug mga turista sa dakbayan ang nagtapok diha atubangan sa Talisay City College sa barangay Poblacion para mosaksi sa dance showdown sa "Halad" niadtong Domingo.
Ang "Halad" usa ka lahi nga presentasyon tungod kay dili kompetisyon ang gipahigayon nga dance interpretations sa mga contingent diin pulos lang mga Talisaynon ang makasalmot niini.
Halad buot ipasabot pahinungod sa kapistahan sa patrona sa siyudad Santa Teresa de Avila.
Ang mga opisyal sa siyudad, mga magtutudlo, kadagkoan sa Department of Education (DepEd) ug si kongresista Eduardo Gullas sa unang distrito sa Sugbo ug ang asawa niini nga si Norma "Mingming" Selma misaksi sa "Halad".
Walo ka contingent ang misalmot sa "Halad" diin gilangkuban kini sa San Roque Elementary School, St. Anthony's Learning Center, St. Teresa School, Cansojong National High School, Divino Amore Academy, Talisay City College, Santa Teresa Pastoral Council ug Talisay City Local Government Unit.
Sa wala pa magsugod ang presentasyon sa dance showdown gipasidunggan una si Gullas diin gihatagan kini og certificate of recognition tungod sa iyang pagka-amahan sa "Halad".
Si Padre Joselito Tajanlangit, kora paroko sa St. Teresa Avila, gipasidunggan usab tungod kay gi-solemnize niini ang "Halad" connection sa tuig sa grasya.