Marina ug CG nangandam na sa kalag-kalag

Ang Maritime Industry Authority (Marina-7) ug Philippine Coastguard ang nagsugod sa pag-umol sa Oplan Kalag-Kalag isip pagpangandam sa pagsaulog sa All Saints Day ug All Souls Day sa Nobiyembre 1 ug 2 niining tuiga.

Sa maong pagpangandam maoy ilang hatagan og dakong pagtagad sa paghatag og kasiguroan ang mga pasahero sa barko nga dili maghinubra ang karga niini aron kalikayan ang aksidente.

Nunot usab ang Land Transportation Office (LTO-7) dinhi sa Sugbo ang hingpit usab nga makig-alayon sa Oplan Kalag-Kalag nga magsugod sa pagpatuman sa Oktobre 31 hangtod sa petsa 5 sa bulan sa Nobiyembre niining tuiga.

Kini ang gipadayag ni Atty Alex Leyson, regional director sa LTO dinhi sa Central Visayas.

Matud pa niya nga higpit usab nilang gipatuman ang Oplan Kalag-Kalag pinaagi sa pagbantay sa mga bus nga sakyanan nga mag-trip cutting atol sa maong mga adlaw.

Dugang pa niya nga may mga bus nga pasaheroan ang magkarga usab og naghinubra nga pasahero nga mopahimulos sa kahigayonan tungod sa kadaghan usab niini sanglit mag-ilogay sa pagpamauli sa ilang probinsiya.

Giklaro niya nga mag-atubang og silot ang mga drayber ug operator sa maong mga sakyanan nga mopahimulos sa maong kahigayonan sanglit kalapasan man kini sa mga lagda nga ilang gipatuman.