'Gun for hire' killer ni Yu

Gihulagway karon sa kapolisan sa Mandaue City Police Office nga mga "professional gun for hire" ang mibanhig sa negosyanteng si Wilson Yu subay usab sa mga nakuhang pamahayag sa mga nakakita sa wala pa ang hitabo.

Si Sr.Supt. Pablo Florante Lamosao sa pakighinabi sa mga tigbalita mibutyag nga dunay nakakita sa mga tudlo sa usa sa tulo ka suspek nga dunay mga "plaster" ang matag tudlo niini.

Kining maong tawo maoy gitumbok nga mipalit diha sa tindahan ug dihang mibayad kini nakit-an ang mga tudlo niini, hinuon ang mga tawo wala kadudahi sa mga residenteng nakakita sanglit normal ra kaayo kining maglihok.

Gidudahan karon nga gituyo gyud ang pagbutang og plaster sa mga tudlo sa suspek aron walay mabiling fingerprints diha sa mahawiran niini kun mahitabo na ang ilang tuyo.

Si Lamosao nagkanayon nga planado ug gipanid-an gyud og maayo ang biktima una pa kini banhigi.

Samtang si mayor Thadeo Ouano namahayag nga pakyas gyud ang kapolisan sa pagpakgang sa nahitabo gumikan sa kahuyang sa intelligence measures sa kapolisan.

Ang MCPO mikuha na kagahapon og cartographer aron paghimo sa cartographic sketch sa mga suspek. Matud pa ni Lamosao nga dunay usa ka residente nga makaduha mibalik sa tindahan diin magpundo ang usa sa mga suspek nga maoy gipahulagway sa itsura niini.

Samtang gihangop usab ni Lamosao ang planong pag-imbestigar sa National Bureau of Investigation sa maong kaso aron madali ang pagsulbad sa kaso.

Sa pagkakaron ang MCPO wala pay solidong anggulo nga gipokusan ang imbestigasyon apan usa na niini ang posibilidad nga may kalambigitan sa negosyo ug personal nga mga kasungian.