Lawas dugta na

Patay'ng lawas sa usa ka lalaki nadugta nga naglutawlutaw sa dagat diha sa lungsod sa Borbon niadtong Miyerkules sa buntag.

Atol sa pakighinabi sa Banat News ni PO2 Edgar Novabos, nasayran nga sila nakadawat og impormasyon gikan sa Bantay Dagat nga gipanguluhan ni Margarito Ornopia nga usa ka mananagat nga si Teodoro Begaldo ang mipahibawo kanila nga adunay nakit-ang patay'ng lawas sa maong dapit.

Nunot niini, daling miresponde ang kapolisan sa maong lungsod uban sa mga Bantay Dagat Operatives aron sa pagkuha sa maong lawas nga naglutaw sa lawod.

Nakuha ang maong lawas pinaagi sa pagguyod niini gamit ang usa ka pumpboat nga gipanag-iya sa maong lungsod.

Si Dr. Corazon Dotillos municipal health officer, maoy mi-inspeksyon sa maong patay'ng lawas ug nadiskobrehan nga nakaangkon kini og ubay-ubay'ng samad pinusilan sa iyang kalawasan ug gikataho nga nabuak ang bagul-bagul sa ulo niini. Gibana-bana nga nagpangidaron kini og 50-60 anyos.