P200 mil gidagit sa drayber

Ang biktima mao si Antonio Cinco,75, minyo, kanhi mayor sa Ginatilan ug ang nasikop mao si Eddie Cantago,32, nagpuyo kaniadto sa Palanas, Ginatilan.

Ang biktima nagpauban sa suspek diha sa buwangan sa Banawa, barangay Guadalupe apan pag-abot didto wala mouban si Cantago sa sulod kay adto lang kini magpaabot sa sakyanan.

Gibiyaan sa suspek si Cinco dala ang sakyanan niini.

Sa pagpauli ni Cinco sa iyang balay nakugang nalang siya kay abli na ang iyang lawak ug wala na ang kinitaan sa iyang gasolinahan sa Ginatilan. Nasuta niya sa mga silingan nga si Cantago ray ulahing nakit-ang misulod ug migawas sa balay.

Miuli si Cantaga sa Pagadian apan nasundan siya ni SPO4 Daniel Commission sa Ginatilan Police kinsa nakadawat og impormasyon sa gitaguan sa suspek nga iyang nasikop didto. Matud pa niya nga kabahin pa kadto sa hot pursuit operation maong legal ang pagkasikop bisan walay warrant.