NBI-7 misugod na'g imbestigar sa CTO: Sutaon gyud ang pameke og permit

Misugod na kagahapon ang National Bureau of Investigation kon NBI-7 sa ilang imbestigasiyon sa gikataho nga sindikato sa mga kawani sa City Hall pagpalusot og peke nga business permit ngadto sa pipila ka mga negosyante.

Si Atty. Renan Oliva, investigator sa NBI-7 maoy nangulo sa pagpahigayon sa maong imbestigasyon diin upat ka mga kawani sa City Treasurer's Office ang iyang gipatawag ug gikuhaan og mga testimoniya kabahin sa nabulgar nga palusot sa mga peke nga business permit.

Matod ni Oliva dihang nahinabi sa Banat News nga ang maong mga mahipos nilang testimoniya maoy ilang himuong basihanan pagtumbok kun tinuod bang nakagamot ang sindikato sa pagpalusot og peke nga business permit sa CTO.

Lakip sa gisukitsukit kagahapon sa NBI-7 mao ang officer-in-charge sa business permit section nga si Elisa Gonzales ug ang staff nga si Ethel Portadilla ug lain pang duha ka mga kawani ubos gihapon sa business permit section.

Nangayu usab si Oliva ngadto kang revenue task force administrative officer Nanette Sungahid sa mga kopya sa mga pirma sa mga tawong otorisado nga mamirma sa business permit.