Aircon tax giduso ni Tom

Si Mayor Tomas Osmeña nagplano nga kolektahan og buhis kadtong mga establisamento nga naggamitan og air-condition sa inadlaw-adlaw nilang operasyon.

Kini tungod kay gipasabot ni Osmeña nga 60 porsiyento sa makonsumo nga kuryente gikan sa mga commercial establishment dinhi sa dakbayan matag bulan naggikan kini sa paggamit og aircondition sa ilang tagsa tagsa ka buhatan.

Sa higayon nga mapatuman ang maong laraw sa mayor mahitabo unya nga kadtong mga establisamento nga nagbaton og daghang aircon mas dako ang mabayran niining buhis.

Gibasehan usab ni Osmeña ang nahipos nga impormasiyon ilabi na kabahin sa Ayala ug SM nga moabot ug P8 ngadto sa P10 milyones ang mabayran niini sa kunsumo sa kuryente sa ilang mga airconditioning unit matag bulan.

Napanglantawan sa mayor nga mosaka ngadto sa 30 porsiyento ang madugang sa makolekta sa siyudad gikan sa real estate taxes sa tanang mga propridad ug butang dinhi sa dakbayan.

Kini gumikan kay ang mahitabo unya nga 80 porsiyento sa kolektahan og real estate tax mao ang mga propridad og 20 porsiyento na lang ang buhisan gikan sa mga luna.

Kabahin usab kining maong kampanya sa gipatuman ni Osmeña nga pagsagop og pamaagi aron makadaginot og makonsumo sa kuryente ang dakbayan.

Hinuon gipasiunhan lang una sa mayor ang publiko ning mao niyang plano alang sa subsob nga pagtuon ug mga rekomendasyon ning maong plano.