Citom ray mosusi sa pagsabotahe sa traffic light system

Ang City Traffic Operation Management mao nay mo-imbestigar sa pipila ka mga kawani nga gipasanginlang misabotahe sa traffic light system sa dakbayan hinungdan sa pagkatibuwaag sa kadaghanan sa mga traffic lights sa dakbayan niadtong milabay'ng mga semana.

Kini misukwahi sa nahaunang desisyon ni Mayor Tomas Osmeña nga ang mga tinugyanan sa National Bureau of Investigation (NBI-7) ang tahasan pagpahigayon og pakisusi.

Apan kagahapon gipahibalo ni Osmeña sa press conference niini nga ang mga opisyal sa Citom mao lay mohupot sa imbistigasyon gumikan kay ang maong isyu naglambigit kini kabahin sa gipapas nga program sa software niini diha sa computer nga maoy nag-kontrolar sa synchronized traffic system sa dakbayan.

Kini tungod kay alang sa mayor dili sa tanang aspeto suhito ang NBI-7 ilabi na ang paghimo og pakisusi kabahin sa napapas nga program sa computer nga naka-on line sa Traffic Control Center sa Citom.

Kumbisido si Osmeña sa pamahayag ni Citom Executive Officer Arnel Tancinco nga duna lay usa sa upat ka mga kawani sa Traffic Control Center ang responsable sa maong binuang.

Matud sa mayor iya nang gipa-terminate ang maong mga kawani ug dunay duha niini ang gipabalhin og destino sa laing departamentoi sa City Hall. Ang resulta sa imbestigasyon maoy himuong basihanan sa posibling pagpasaka og kasong kriminal batok sa mga suspek.