Tamaraw nalimbuwad; gamay'ng bata namatay

Namatay ang usa ka tuig ug 11 ka bulan nga bata'ng babaye sa dihang nadisgrasya ang Tamaraw nga gisakyan niini niadtong Domingo alas 9:30 ang takna sa kagabhion.

Ang biktima giila nga si Maricar Bejoc, molupyo sa Sudtongan Dalaguete Cebu samtang ang nagmaniho sa Tamaraw FX nga adunay plate number nga GDW-641 nga gipanag-iya sa Toyota Company-Mandaue mao si Junrey Mancao nga molupyo sa La Paloma Subdivision, Labangon.

Matud pa ni SPO2 Reynaldo Rubia sa Argao Police Station atol sa pakighinabi sa Banat News nga si Mancao bag-ohay lang nakakat-on sa pagmaneho hinungdan nga gipahimangnuan kini ni Alberto Samante nga empleyado sa Toyota Company nga magpahinay sa pagmaneho apan wa kini paminawa ni Mancao.

Nasayran nga nagbiyahe kini gikan sa Sugbo paingon sa lungsod sa Dalaguete, sa dihang nagbaybay kini sa highway diha sa Poblacion sa lungsod sa Argao kalit ang kusog nga pagkalimbuwad sa maong sakyanan atol sa iyang kusog nga pagliko sa usa ka kurbada.

Ang bata nga gisabak sa iyang amahan nga si Eric Medina Bejoc nabuhian hinungdan nga napantok ang ulo sa bata sa salug sa sakyanan.

Gumikan niini ang bata naka-angkon og dakong kadaut sa iyang ulo ug dali kining gidala sa Isidro C. Kintanar Memorial Hospital apan gideklarar na kining Dead on Arrival.