Motor vs motor sa Camotes; 1 patay, 1 grabe

Usa ang patay samtang usa ang grabeng naangol human magbangga ang duha ka motorsiklo diha sa Sitio Nego Western Poblacion San Francisco Camotes Cebu niadtong Sabado sa alas 11:10 sa buntag.

Si Alex Aguinsando Wenceslao, 46, minyo ug molupyo sa Sitio Cabutche, Barangay Campo San Francisco nakabsan sa iyang kinabuhi gumikan sa pagkapantok sa ulo niini diha sa sementadong dalan. Siya nagmaneho sa usa ka Kawasaki kolor pula nga nagtangag sa plakang plate number nga GB-1771.

Nasayran sa pagpakighinabi sa Banat News nga si Wenceslao nagdali-dali tungod kay padulong pa kini magkuha sa iyang gipagaling nga bugas diha sa lungsod.

Si PO3 Celso Cabrillas sa San Francisco Police Station nagkanayon nga si Wenceslao mi-overtake sa usa ka trak de karga hinungdan nga wa siya makabantay kang Clarito Lao Gonzales Jr., 29, minyo ug molupyo sa Sitio Simangan, Western, Poblacion Poro San Francisco Cebu nga nagmaniho usab sa iyang motor nga adunay plate number nga GF-2366.

Ulahi na ang tanan sa paglikay tungod kay kusog man kaayo nga nagpadagan si Wenceslao hinungdan sa maayong pagkabangga sa tuhod ni Gonzales ngadto sa motor ni Wenceslao samtang ang ulahi nalagpot ngadto sa highway diin nakaangkon kini og kadaot sa ulo.

Tungod sa maong insidente nakaangkon og dakong kadaut si Gonzales sa iyang tuo'ng batiis samtang si Wenceslao gidiklarang Dead on Arrival dihang gidala kini sa Ricardo Maningo Memorial Hospita.