Vigilante balik napud; 1 gitipi

Human sa pipila ka semana nga pagpakahilom mibalik na usab sa ilang trabaho ang gituohang mga sakop sa vigilante human nabati na usab ang ilang presenya dihang gitumba ang usa ka ex-convict nga natulog diha sa aseras sa dalan Legaspi, barangay Sto. Niño ning dakbayan.

Ang biktima maoy labing ulahing naapil sa kapin 90 na ka mga biktima sa "extra-judicial killings" dinhi sa dakbayan gumikan lang kay duna kini rekord nga nabilanggo.

Giila ang biktima nga mao si Esteban Yapi, 32, nabantog sa ngalan nga "waray" sa maong dapit, ulitawo ug taga barangay Mabolo ning dakbayan. Si Waray gipusil samtang natulog sa aseras.

Ang kapuyo sa biktima nga si Elizabeth Sikatuna, 20, dalaga ug taga Sikatuna Riverside ning dakbayan nagkanayon nga duha ka mga wala mailhing mga lalaki luwan sa usa ka kolor pula nga motorsiklo ang mihunong duol sa gikatulgan sa iyang kapuyo.

Ang backrider niini mikanaog ug gidul-itan og pusil sa ulo si Yape diin migamit pa og 'silencer' ang suspek nga gihulagway nga putot.

Nasayran nga ang mipusil gihulagway nga duna ray gitas-ong 5'3"ang ug makadaghan nang kini mibalik sa maong lugar ug nangita kang Yape apan kanunay kining dili makit-an sa maong lugar.

Ang biktima nakaangkon og samad pinusilan sa tuong bahin sa ulo. Dali kining gidala sa Cebu City Medical Center apan namatay ra usab kini pipila ka oras ang milabay samtang ang mga suspek daling misibat padulong sa dalan Pelaez human sa maong hitabo.