Daghang malnourished

Mas nidaghan ang kaso sa mga malnourish nga kabataan gikan sa kabus ug naglisud nga pamilya dinhi sa dakbayan karung tuiga kon itandi niadtong mga milabay'ng katuigan nga gituohang epekto sa padayung pagmahal sa mga palaliton nonot ning walay hunong nga pagsaka sa presyo sa mga produktong petrolyo.

Kini maoy nahipos nga inpormasyon sa tsirman sa committee on health sa konseho sa siyudad sa Sugbo konsehal Cristopher Alix sa subsub nga gihimong pagmonitor niini sa mga molopyo sa 80 ka mga barangay ning dakbayan.

Kini maoy hinungdan nga giduso sa konsehal sa milabay'ng tigum niini sa nutrition council ang pag-tap sa mga Non Governmental Organization kon NGO's ug mga Civic Organization aron ma-sustinir ang gipasiugdahan nga feeding program ngadto sa mga kabataan gikan sa kabus nga pamilya.

Usa sa gi-negotiate karun sa siyudad alang ning maong katuyo-an mao ang Gochinghai Foundation ug gi-promote usab ang produkto niini nga tag P7 lang nga gitawag ug high protein nga isagol sa kan-on ug mahimo nang kan-on bisan ug walay sud-an gumikan kay kumpleto na man kini sa protina.

Gibutyag sa konsehal nga ang mga congested barangays dinhi sa dakbayan gikan sa Sitio San Roque lahos na sa barangay Alaska,Mambaling maoy pilot area sa ilusad nga feeding program nga himoon nga gitumong aron paghatag ug pagkaon sa mga malnourished nga kabataan nga kumpleto sa protina.

Ang Nutrition Council sa dakbayan wala pay kumpletong statistic kon pila na ang gidaghanon sa mga malnourished nga kabataan gikan sa kabus nga pamilya dinhi sa dakbayan karung tuiga.

Apan subay sa statistic niadtong mga milabay'ng duha ka tuig mokapin sa 6 mil ka mga kabataan dinhi sa dakbayan ang malnourished kon kuwang sa timbang gumikan sa kakulang sa bitamina hinungdan nga kuwangan usab ang ilang timbang.