Dok sa puya naputlan og ulo manubag sa reklamo

Doktor nga miatiman sa puya nga napunggotan og ulo atol sa pagpaanak diha sa Ricardo Maningo District Hospital sa lungsod sa San Francisco Camotes andam moatubang sa reklamo.

Si Dr. Leah Celestial sa usa ka interbyo sa lokal nga sibyaanan kagahapon mipadayag nga silang mga medical personnel sa maong tambalanan mihimo lang gyud sa ilang makaya sa pag-atiman kang Jocelyn Suhot,26, kinsa taga Tudela, Camotes.

Matud pa ni Celestial nga miabot si Suhot sa tambalanan alas 3 sa kadlawon gikan pa sa Tudela luwan sa usa ka pumpboat nga nagsiwil na ang ulo sa bata.

Sumala pa niya nga gitug-an sa mga kabanay ni Suhot nga ilang gidala ang pasyente gumikan kay wala madala sa hilot nga mitabang kaniya nga mapagawas ang lawas sa anak niini, maong iya nalang gitauran og mga pasiunang tambal ang inahan samtang gipangitaan og paagi aron "mobusog" ug mapagawas sa hingpit ang bata.

Apan namatikdan ni Celestial nga humok na ang liog sa puya ug daw nabali na ang liog niini, nagtuo siya nga patay na ang bata pag-abot gumikan sa paglihok-lihok ni Suhot atol sa pagdala pa lang kaniya gikan sa Tudela.

Nasayran usab ni Celestial nga sa prenatal check-up ni Suhot nakabutang sa rekomendasyon nga sa ospital gyud kini kinahanglang manganak sanglit nagduda silang kaluha ang anak niini.

Samtang kabahin usab sa iregularidad sa pagbiyahe sa usa ka pasyente matud pa niya walay nakahatod nga ambulansiya kang Suhot gumikan kay gisugo ang maong sakyanan pagkuha unta sa nars nga moabag kaniya aron ipahigayon ang dinaliang pag- caesarean kay naputol man ang ulo sa puya, apan gumikan sa kalayo wala pa kini makaabot.

Rason pa ni Celestial nga alas 5:30 mogikan ang barko padulong sa Sugbo, dihang miinsister ang mga kabanay niini nga dad-on nalang sa siyudad ang pasyente alas 5:25 na sa kaadlawon maong nagkara-kara sila aron makaapas, wala usab nila kahatagi og stretcher gumikan kay nahurot og kawala sanglit wala na mauli sa mga nagdala pangadto sa Vicente Sotto Memorial Medical Center kaniadto pa.

Samtang giklaro usab niya nga dili reseta ang gidala ni Suhot kun dili listahan sa mga tambal nga nakuha diha sa ilang tambalanan maong wala kadtoy pirma sa doktor ug professional license niini. Wala usab nakakuyog nga medical personnel gumikan kay siya ra ug usa ka aide, gwardiya ug drayber sa ambulansya ang naa didto nga nag-duty.