Lawas sa puya nahibilin sa tiyan sa mama

Ulo sa batang gikatakdang ipanganak nahulbot ug nabuwag sa lawas niini diin nahibilin pa sa sulod sa taliangkan sa iyang inahan ang iyang lawas gumikan sa gialegar nga "negligence" sa mga miatimang medical personnel niadtong nakalabayng adlaw ug nagbutang usab sa peligro sa kinabuhi sa inahan.

Ang insidente gikatahong nahitabo diha sa usa ka tambalanan sa San Francisco, Camotes Island sumala pa sa grupo sa Cebu Provincial Capitol nga bag-uhay lang milusad og information caravan ni Bokal Agnes Magpale nga Children's Code sa maong lugar uban sa Children's Legal Bureau ug End Child Prostitution and Pornography(ECPAT).

Giila ang inahan sa puya mao si Jocelyn Suhot,26, taga Negros Oriental kinsa gikasakay sa mga kawani sa kapitolyo sa barkong maghatud kanila gikan sa Camotes ngadto sa Ouano wharf sa dakbayan sa Mandaue. Niadtong higayuna si Suhot gidali og dala sa tambalanan dinhi sa dakbayan gumikan sa nahitabo sa ipanganakay niini sumala pa ni Marivic Garces ang officer in charge sa Provincial Social Welfare Office kinsa giingong nakakita sa kahimtang ni Suhot nga walay kaubang taga Ricardo Maningo District Hospital.

Dugang pa ni Garces sa pakighinabi sa The Freeman/BANAT News gawas sa walay kaubang taga ospital wala say tarong nga gihigdaan si Suhot sanglit banig ray gihapinan niini samtang ang ulo sa anak niini gisulod lang og papel nga karton.

Nasuta usab nga walay pirma o ba kaha Professional License number sa doktor nga miatiman ang reseta nga gidala ni Suhot, dala usab niya ang usa ka adult kit, oxytocin ampule ug uban pa nga nagkantidad tanan og P1,000.

Nasuta gikan sa nakuhang impormasyon ni Garces gikan kang Suhot nga gidala kini sa maong tambalanan alas dos sa kadlawon niadtong Miyerkules gumikan kay wala madala sa hilot ang pagpaanak kaniya, apan gialegar usab nga wala diha ang doktor nianang tungura maong ang nars nalang maoy miatiman kaniya sa pagpaanak.

Hinuon si Integrated Provincial Health Officer Cristina Giango sa pakighinabi sa The Freeman/BANAT News nga huwaton una nila ang opisyal nga report gikan sa maong tambalanan kalabot sa mga pasangil.

Si Garces na maoy mitawag kang Giango sa pagpreparar og ambulansya nga maghatud kang Suhot sa Vicente Sotto Memorial Medical Center diin naluwas si Suhot, matud pa nga wala na operahi si Suhot gumikan kay normal nga gipagawas sa iyang lawas wala nay ulong lawas sa iyang anak.

Galaraw karon ang representante sa ECPAT nga si Gala Enerio nga mopaimbestigar niini ngadto sa buhatan ni Bokal Magpale sanglit nagtuo siyang dili lang kini ang mga insidenteng nahitabo sa mga hilit nga mga tambalanan gumikan sa dili maayong pag-atiman sa mga medical personnel.