I.D. system sa mga vendors sugdan sa Pasil fish market

Ipatuman na sugod karong petsa 1 sa bulan sa Oktubre ang I.D. System sa tanang mga manindahay sa kamerkadohan dinhi sa dakbayan sa Sugbo.

Gibutyag ni Acting Market Administrator Elpidio dela Victoria Jr. ang mga manindahay sa Pasil Fish Market nga maoy pilot area niining maong programa.

Matud ni dela Victoria human sa implementasyon sa I.D. System sa Pasil isunod dayon ang pagpatuman niini ngadto sa tanang mga manindahay sa satellite market dinhi sa dakbayan.

Atol unya sa pagpatuman niini gitugotan na lang kadtong mga stall owner nga makabaton og tag duha ka katabang nga obligahon nang magsul-ob og I.D. sa ilang pagpaninda.

Gipasabot ni dela Victoria nga tumong niini nga malimpyo ang mga kamerkaduhan dinhi sa dakbayan ug malikayan ang pagpamaligya og puwesto sa ubang mga stall-owner ngadto sa ilang mga supplier.

Daghan og nadawat nga report ang market authority kabahin sa pagpamaligya og puwesto sa mga nag-abang niini ngadto sa ilang mga supplier ilabi na kon duna kini dakong utang ngadto sa ilang mga supplier ug isda ingon man karne.

Kini gumikan kay ang pagsagop ning maong I.D. system susama man kini sa sistema nga gisagop sa pagpatuman og I.D. System sa South Coastal Road sa SRP diin monitoron na kadtong tanang mga naghupot og SRP pass nga mapatik ang hulagway ug pangalan niini sa computer.

Gitinguha sa market authority nga sa pag-intra sa tuig 2006 hingpit nang mapatuman ang I.D. system ngadto sa tanang mga manindahay sa kamerkadohan dinhi sa dakbayan.