50-anyos naligsan-patay

Naligsan ug namatay gayod ang usa ka tawo nga naunay sa pagdasmag sa gimaneho niining sakyanan dihang kalit usab kining gidombol sa laing sakyanan.

Ang aksidente nahitabo didto sa United Nations Avenue sa barangay Umapad, siyudad sa Mandaue alas 9 pasado ang takna sa buntag niadtong miaging adlaw.

Ang namatay giila nga mao si Geregaine Minorias, 50 , minyo nga taga Kimberly Subdivision, barangay Cansojong sa dakbayan sa Talisay nga maoy nagmaneho sa Isuzu Elf nga dunay plate number PEZ 729.

Ang nagdombol nga sakyanan mao ang Fuso truck nga nagdala sa plate number GVR 202 nga gimaneho usab ni Felipe Fabrica, 38, minyo nga taga Biasong sa dakbayan usab sa Talisay.

Sa imbestigasyon ni SPO2 Genaro Lambayan sa traffic section sa kapolisan sa maong dakbayan maoy nahibaw-an nga kalit lang kining nakasinati og engine trouble ang gimaneho nga sakyanan sa biktima.

Gipahiluna niini sa pag-parking sa daplin sa karsada ug nanaug ug giablihan ang tabon sa makina sa atubangang bahin aron sa pag-check up sanglit kalit lang mipalyar ang andar.

Samtang nagpadayon sa pag-check up ang biktima ang luyong bahin sa gi-parking nga sakyanan ang kalit lang milagapak dihang ang sakyanan nga gimaneho ni Fabrica ang kalit lang usab nga midombol.

Gumikan sa kusog nga impact sa maong pagdasmag ug naharos gayod kini og pipila ka metros nga gilay-on nga maoy hinungdan sa dakong kadaut sa kalawasan sa biktima.

Dali unta nga gidala ang biktima ngadto sa Mactan Doctor s Hospital apan ang mga doktor nga nag-atiman ang mideklarar niining patay na gayod nga nahidangat kanila.

Ang kasong reckless imprudence resulting to homicide maoy gihikay nga kaso sa kapolisan batok kang Fabrica kinsa kasamtangan karong gibalhog sa sulod sa ilang detention cell.