Mahitungod sa tulis sa EW Tomas 'nilain' ni Cardinal Vidal

Giangkon ni Mayor Tomas Osmeña nga duna gyuy limitasyon ang kapolisan pag-abot sa pagpatuman sa kahapsay ug kalinaw sa dakbayan apan iyang gipangangkon nga ang dakbayan kanunay'ng nangita og paagi nga mapalambo ang kahimtang niini.

Kini maoy reaksyon ni Mayor Tomas Osmeña kalabot sa pagsaway ni Cebu Arsobispo Ricardo Cardinal Vidal kalabot sa pagtulis sa East West Bank diha sa Ayala Business Park niadtong Lunes diin gihulagway sa arsobispo ang mga pangangkon sa kapolisan ug dakbayan nga dili epektibo.

Si Vidal mipadayag og kasagmuyo sa nanggawas nga pamahayag sa mga opisyal sa dakbayan nga mipasangil ngadto sa maong bangko sa rason nga luag kaayo ang ilang seguridad.

Gipangutana sa Cardinal kun unsay gihimo sa mga polis nianang tungora ug kun unsa pa ang ilang angayang buhaton aron kapugngan ang posible pang mahitabo sa mosunod nga mga adlaw.

"Why, just because one bank was robbed? Well it's good that people will realize that the police has its limitations," asoy pa ni Osmeña ngadto sa mga tigbalita kagahapon.

Giangkon usab sa mayor nga duna gyuy mga kakulangon ang kapolisan apan gipangitaan na kini og paagi aron mapalambo ang kasamtangang kahimtang sa mga polis.

Nangangkon usab siya nga ang kapolisan sa Sugbo mao karoy "best shooters" sa police force sa nasud, kahinumduman nga gimanduan niya ang Cebu City Police Office sa pagpahigayon og pagbansay-bansay sa paggamit og armas gumikan kay namatud-an sa City hall nga banga ang kadaghanan sa 900 ka mga polis sa dakbayan.

Gibasol niya ang mga bangko nga nagmagahi sa pagpatuman og mga kausaban sa ilang mga seguridad bisan sa rekomendasyon sa kapolisan nga gikinahanglang ilang sundon aron maprotektahan ang ilang negosyo.

"Our police are doing better while these banks do not want to move (improve), why would we help them when they do not do their share," rason pa sa mayor.

Ang kapolisan dako og pagtuo nga kun duna pay dugang guwardiya ug modernong alarm system ang maong bangko dili kini masayon-sayon og tulis, ang East West Bank makaduha na ka higayon gitulis ning tuiga.