Gidul-itan og pusil: Anak babaye naangol

Patay ang usa ka 96 anyos nga "tambalan" human kini dul-iti og pusil sa nawong samtang naangol usab ang iyang anak nga babaye dihang gisaka sa nag-bonet nga lalaki ang ilang balay diha sa Barangay Rizal lungsod sa Pinamungajan niadtong Lunes sa gabii.

Ang mga biktima giilang sila si Beatriz Gimpisao,96, biyuda ug giingong mananambal sa binisaya sa maong lugar ug ang iyang anak si Lilia Ruiz,57, anak niya sa unang bana.

Si PO3 Romeo Jaranilla nagkanayon sa Banat News nga nakaila sa tingog sa suspek ang anak sa namatay maong iya kining giablihan bisan lawom na ang kagabhion dihang nanawag kini sa gawas.

Sumala pa nga nagpakaaron-ingnong gisakitan og tiyan ang suspek ug nanampit kang Gimpisao apan midumili ang mananambal nga padayunon kini , apan ang anak niya nga si Ruiz maoy nangabli ug gipasulod ang suspek kinsa nag-bonet diay.

Nianang tungora wala na makapanagang ang duha dihang kalit silang gipamusil makadaghang higayon sa suspek , si Gimpisao nakaangkon og samad pinusilan sa tuong aping nga milapos diha sa iyang walang apapangig, patay na kini dihang nahiling ni Dr. Sheila Faciol ang medico legal sa ilang dapit, samtang daling gidala si Ruiz sa usa sa mga tambalanan sa dakbayan sa Sugbo gumikan sa igo diha sa walang abaga nga milapos sa likod.

Dako ang pagtuo sa kapolisan nga posibleng kabanay ra o ba kaha silingan sa mga biktima ang suspek sanglit nakatug-an pa si Ruiz sa mga kabanay nga nakaila siya sa tingog sa suspek.

Gisalikway usab sa kapolisan ang posibilidad nga pagpanulis ang tuyo sa suspek sanglit wala man mahilabti ang P1000 nga salapi diha sa altar sa mga biktima, gituohang dunay grabeng kalagot ngadto sa namatay ang suspek maong nahimo ang krimen.