Samtang nangandam sa dialogue: Tau girapido sa Akrho

Samtang nangandam niadtong Lunes ang mga kadagkuan sa Alpha Kappa Rho ug Tau Gamma Phi aron makigtagbo kang Cebu Governor Gwendolyn Garcia duna say mga sakop sa Tau Gamma Phi ang gipangrapido sa mga gidudahang mga sakop sa Alpha Kappa Rho diha sa barangay Poblacion lungsod sa Sibonga sa samang adlaw.

Si SPO3 Ramon Padilla mibutyag sa Banat News nga alas onse pasado sa buntag midangop sa kapolisan ang usa ka Ranchito Villamor gumikan sa pagkadaut sa iyang traysikol nga panginabuhian dihang naigo kini sa mga saag nga bala dihang dunay duha ka mga batan-ong lalaki nga nagluwan og motorsiklo ang kalit nga mirapido pundok sa mga batan-on diha sa Railway Poblacion.

Nasayran nga ang mga nagpundok mga sakop diay sa Tau Gamma Phi nga sila si Raymund Belen,19, Melchor Villacorta, usa ka naila lang sa bansag nga Suico, 20 anyos, ug duha ka minor nga sila si Junmar ug Ritchie pulos mga molupyo sa maong lugar.

Usa sa mga nagmotorsiklo giila sa mga biktima nga mao si Vinson Apura, hingkod ang panuigon ug giingong sakop sa Akhro ug taga lungsod sa Carcar uban sa usa ka wala mailhing lalaki.

Nakuha sa kapolisan diha sa crime scene ang duha ka basiyo sa kalibre 45 nga bala, usa ka basiyo sa 9 mm nga bala ug usa ka slug, samtang nangabuslot usab ang traysikol ni Villamor.

Pag-abot sa kahapunon usa ka giingong sakop sa Tau Gamma ang nadakpan sa kapolisan sa Sibonga human dunay mga residenteng nanawag sa ilang buhatan kalabot sa paghupot og armas.

Ang gidakop giilang si Joel Roble Hermoso, 25, ulitawo ug molupyo sa Barangay Tinaan lungsod sa Naga, nakuha gikan kaniya ang usa ka kalibre .357 rebolber nga may sulod nga upat ka buhing bala sa 357 ug duha ka bala sa kalibre 38.Walay napakitang dokumentos ang suspek ug kasamtangan na karong gibalhog sa karsel.

Si Gobernador Gwendolyn Garcia nakigtagbo niadtong Lunes sa mga lider sa Akhro ug Tau Gamma Phi aron paminawon ang ilang mga deperensya sa usag-usa sanglit si Cebu Provincial Police Office Director Vicente Loot mihulga nga iyang bansagang "criminal groups" ang duha.

Mipasalig ang duha ka mga grupo nga mohatag sa talaan sa ilang mga lehitimong mga miyembro aron mamonitor kun si kinsa ang mga badlungon ug mapangitaan og paagi ang pagsulbad sa ilang mga problema.