2 ka frats napugngan

Dugoon untang hitabo ang masaksihan niadtong miaging gabii sa barangay Umapad sa siyudad sa Mandaue kon natigayon pa gayod ang panag-engkuwentro sa pundok sa mga batan-ong lalaki nga gituohang mga sakop sa fraternity.

Ang maong pundok sa mga batan-ong lalaki ang nagtapok na sa hilit nga dapit nga giingong nanagdala kini ug hinagiban nga nag-atang sa laing pundok sa mga batan-on nga nagpaingon nga nanagdala usab og hinagiban.

Si Umapad Barangay Kagawad Nelson Rubio nga gikahinabi sa Banat News ang miingon nga dali nga nakapahibalo kanila ang mga lumolupyo kinsa maoy unang nakamatikod sa panag-engkuwentro sa nagkatapok nga mga batan-on.

Matud pa ni Kagawad Rubio nga kuyog nila ang mga barangay tanod sa paghimo og pakisusi ug ang maong pundok sa mga bata-ong nagtapok ang dali usab nga nakapahilayo.

Dugang pa ni Rubio nga may nasignit silang pipila ka mga kauban kinsa maoy mitug-an ngadto kanila sa gikatakda untang panag-engkuwentro batok sa laing pundok sa mga batan-on nga nagdala usab og mga hinagiban.

Sumala pa ni Rubio nga ang nakadagan nilang mga kauban ang may mga hinagiban ug ang ilang nadakpan ang nanagdala lamang ug mga bunal nga maoy ilang gisukitsukit ug gipapauli.