LRT ang solusyon

Way laing solusyon sa kahuot karon sa kadalanan sa Metro Cebu gumikan sa nagsugwak nga mga sakyanang de motor, gawas sa light railway transit (LRT) system.

Kini ang gipanghingusgan ni Kongresista Eduardo Gullas sa unang distrito sa lalawigan sa Cebu busa iyang gisang-at ang usa ka balaodnon sa kongreso kalabot niini.

Sa House Bill 3006 nga gipangamahanan ni Gullas, kini nagbuot ug nagmando sa Department of Transportation sa pagpatuman na sa plano sa LRT system sa Metro Cebu.

Matud pa ni Gullas nga ang sitwasyon karon sa panakyanan sa Metro Cebu, makapahinay sa ekonomiya gawas kon may tukmang panukdanan ang kagamhanan nga sagupon.

Kini tungod kay gumikan sa kahuot pirme sa trapiko, hinay usab ang pagpanghatod sa mga serbisyo ngadto sa publiko.

Gani matud pa ni Gullas nga gumikan sa kalisod agion sa mga karsada, kasagaran sa mga sakyanan mobiyahe sa gikusgon nga 10-15 kilometros matag oras.

Ang Metro Cebu gilibotan sa mga siyudad sa Talisay, diri sa habagatan ug Cebu, Mandaue ug Lapu-Lapu sa amihanan, uban usab sa lungsod sa Minglanilla, Consolacion, Liloan ug Compostela.

Gipaabot nga mogasto ang maong proyekto og usa ka bilyon ka dolyar, matud pa ni Gullas.