Tawo gilubong bisan wala pa mailhi

Gilubong na lang nga wala mailhi ang usa ka patay'ng lawas sa lalaki nga napalgang naglutaw sa kadagatan sa lungsod sa Moalboal niadtong miaging semana.

Kini ang nasayran kang P03 Allan Kintanar sa nahisgotang lungsod kinsa nanawagan sa mga kabanay sa pag-ila na lamang sa mga gitipigan nilang mga butang sa maong patay'ng lawas.

Matud pa ni Kintanar nga ang t-shirt, short pant nga puti, pitaka nga may sulod pa nga kuwarta nga P3,100 ang kantidad ang anaa karon kanila.

Dugang pa niya nga may wedding ring nga 18 k nga gisull-bo ang biktima apan wala kini pangalan nga maoy maggiya sa pag-ila sa maong patay'ng lawas.

Nakaplagan usab unta ang pitaka nga gisulod sa luyong bahin sa bulsa apan wala kini isulod nga ID gawas lamang sa kuwarta.

Giklaro ni Kintanar nga ilang gilubong ang maong patay'ng lawas sanglit nagkaanam na kini og kabaho bisan giimbalsamar punerarya.

Maoy ilang pagtuo nga luwan sa barko ang biktima ug natagak kini sa dagat sa paghiagi sa maong dapit sanglit wala man gayod mga tagtungod nga nangita o nakaila niini sa maong dapit.