Kampanya batok dengue

Tagbilaran City - Gimanduan karon sa mga tinugyanan sa panglawas ning dakbayan kadtong mga tag-iya og gagmayng mga tindahan nga tumanon gayod niini ang pagseguro nga limpyo ang ilang palibot.

Gitumong kini aron pagseguro sa panglawas sa ilang mga kustomer ingon man malikayan usab nga sila makahatag sa dugang problema bahin sa gikabalak-an karon nga sakit nga dengue.

Nabalaka ang mga tinugyanan sa panglawas ning probinsya nga musaka pag-ayo ang kaso sa dengue nga natala sa ilang buhatan.

Hinuon sa pagka karon padayon pa nila nga gimonitor ang kaso sa dengue nga nahitabo sa kabararangayan.

Kadaghanan sa mga biktima gikataho nga gidala gayud sa mga pribadong tambalanan.

Si Mayor Dan Neri Lim nanawagan usab sa tanang mulopyo sa dakbayan nga magtinabangay aron sa ingon magpabilin ang kalimpyo sa dakbayan ug malikay sila sa sakit ilabi na gayud sa dengue.