Tawo naigo sa de-bomba namatay

Pagpamusil og manok miresulta sa kamatayon sa usa ka lalaki nga giila nga si Jovito Payao alyas "Kudoy", 37, minyo ug molupyo sa sitio Badiang, barangay. Tinuddan Daan Bantayan niadtong Biyernes sa alas 4:45 sa hapon.

Suma sa imbestigasyon nga gihimo nila ni SPO1 Carlos Cordino miangkon ang asawa ni Payao nga ang iyang bana gisugo sa ilang silingan nga si Francisco Pepito sa pagpusil sa ihalas nga manok nga nasaag sa iyang tugkaran.

Si Francisco nagkanayon nga ulahing nakit-an ang biktima nga naglingkod sa bangko nga kawayan ug naggunit og pusil para ipatay sa saag nga manok. Pipila ka gutlo ang milabay siya nakadungog og buto sa pusil ug sa iyang paglingi mao nalay iyang nakit-an ang pagkahagba sa biktima.

Gidali pagdala si Payao sa tambalanan apan wa na kini makaabot tungod kay namatay kini sa trisikad nga gipanag-iya ra usab sa maong biktima.

Matud pa ni Dr. Nicomedes Javel nga ang hinungdan sa kamatayon sa biktima mao ang pagkasulod sa bala sa CO2 airgun ngadto sa baba niini ug kini wa makagawas.

Nakuha sa kapolisan ang CO2 Airgun usa ka matang sa armas nga gamiton alang sa langgam ug uban pang hayopan nga adunay teleskopyo ug silencer nga maoy gituohang gigamit sa biktima.