Kaso ni Mayor Tining: Politika ang rason - Clavel

Daku og pagtuo si Kongresista Clavel Martinez sa ikaupat nga distrito nga ang pagpirma niya sa "impeachment" batok kang Presidente Gloria Arroyo maoy dakung hinungdan sa paglambigit sa ngalan sa iyang anak nga mayor, sa tulis sa bangko sa lungsod sa Bogo.

Mao kini ang gibutyag ni Mayor Celestino 'Tining' Martinez III kinsa nagkanayon nga nangayo kaniya'g pasaylo ang iyang inahan nga si Kongresista Clavel sa maong hitabo.

Sa laing bahin walay laraw si Mayor Martinez sa pagsumbalik og kiha batok kang Dindo Ancero tungod kay ang iyang gilantaw karon mao ang iyang pagkandidato sa Kongreso karong umaabot nga 2007.

Gani mitug-an siya nga nagsugod na siya og pakigkulakabildo ug pangulitawo sa mga kapitan sa barangay sa ikaupat nga distrito bahin sa iyang plano.

Giisip usab niya nga may dakung kalambigitan ang gobernador sa lalawigan, Gwen Garcia ug ang hepe sa Cebu Provincial Police Office Supt. Vicente Loot iyang gihangyo sa dili pagsakay ning maong isyu sa pagduhig sa iyang ngalan sa pagtulis sa Land Bank of the Philippines (LBP) sa Bogo niadtong unang semana sa Agosto, ning tuiga.

Matud pa niya hugaw kini nga paagi sa pamolitika aron lamang dauton ang iyang dungog ilabi na ang posibleng makaatbang niya karong umaabot nga eleksiyon mao si Mayor Ma. Luisa Loot sa Daanbantayan, asawa ni Supt. Loot.