Money changer gitulis, P200 mil nada sa tulisan

Mindanao rob group nangigo na sad, P200,000 nga salapi nasakiyo kagahapon sa udto diha mismo sa gate sa Aibee Minimart Money Changer diha sa dalan Juan Luna barangay Mabolo ning dakbayan.

Apan duha sa tulo ka mga suspek ang nailhan sa mga testigo diha sa maong establisamento ug giila ang duha nga mao sila si Doroteo Emperial ug Roldan Villanueva kinsa duha lamang sa mga notadong tulisan dinhi sa lalawigan sa Sugbo, samtang ang ikatulong suspek nga maoy nagmaneho sa kolor pula nga motorsiklo wala mailhi gumikan kay nasalipdan kini sa paril.

Si Morita Legara Colina, ang tag-iya sa maong establisamento mitug-an sa BANAT News kagahapon nga P200,000 ang dalang kwarta sa iyang drayber nga si Jessee Ortega Hernane kinsa mohatud unta sa maong kwarta ngadto sa Queensly Homes sa dakbayan sa Mandaue.

Usa sa mga testigo nga si Floreta Ando mitug-an sa mga imbestigador sa Theft and Robbery Section nga si SPO1 Isagani Pugoy ug Criminal Intelligence Branch Chief Pablo Labra nga kamay-ong ni Imperial ang usa sa mga suspek.

Sumala pa ni Ando nga nagpa-load pa ang duha sa ilang cellphone maong nakaklaro kini samtang ang kauban ni Imperial maoy gikatahong magpunay og dungo samtang nagpa-load.

Apan usa sa mga katabang sa maong establisamento nga 16 anyos nga bata kinsa nag-apong diha sa gawas sa ganghaan sa tindahan mitumbok sa hulagway ni Villanueva diha sa mga hulagway sa police files.

Si Hernane wala kapalag dihang gipaisa ang iyang mga kamot ug gitiunan og duha ka kalibre 45 nga pistola sa duruha samtang gihuboan sa beltbag nga gisudlan sa kwarta ug daling nangikyas luwan sa motorsiklo nga nagpaabot sa S. Cabahug padulong sa direksyon sa Mandaue City.