Bilahan sa sikyu naigo sa bala

Gidali paghatod sa tambalanan ang usa ka guwardiya human ang gitaken niining armas nga kalibre .38 ang kalit lang natagak ug miboto ug didto gayod moigo sa bilahan niini.

Ang aksidente nahitabo alas 7 pasado ang takna sa miaging gabii didto sa sulod sa Compound nga gibantayan niini nga nahimutang sa barangay Jagobiao, siyudad sa Mandaue.

Ang biktima mao si Ferdinand Paselaban Jr., hingkod ang panuigon, ulitawo nga nagpuyo usab sa nahisgotang dapit.

Sa nahibaw-an sa Banat News gikan sa kapolisan nga nagdagan sa pag-abli sa gate ang biktima sanglit may mosulod nga sakyanan.

Natagak ang gigunitang ballpen nga maoy nakaingon sa pagdungo niini aron unta sa pagpunit apan ang armas nga gisulod sa holster natagak ug aksidente kining miboto. Gidala siya sa Vicente Sotto Memorial Medical Center.