Buhawi mihagsa sa dagat duol SRP

Nagkagubot ang mga residente sa dakbayan sa Talisay niadtong Domingo sa buntag tungod sa usa ka buhawi nga mihagsa sa dagat duol South Reclamation Project sa dakbayan sa Sugbo.

Matud pa sa mga residente sa barangay Poblacion, Talisay kinsa nahinabi sa Banat News kagahapon nga nalantawan nila diha daplin sa baybayon nga adunay nag-itom sa unahan dapit sa lawod bawod sa dagat atol pagkahagsa niini.

Tungod sa kalisang nga dunay tidal waves nga mahitabo ang mga nangaligo sa dagat daling mihaw-as ug nanghipling sa daplin sa baybayon.

Apan walay gikataho nga dunay mga naapektohan sa maong insidente ug walay gikataho nga dunay nahagsaan sa maong buhawi.

Si Clod Alviola, weather observer sa Pagasa-Mactan nagkanayon nga may posibilidad nga modagko ang bawod sa dagat kun ang maong buhawi diha pa mihagsa sa coastline.

Ang buhawi adunay gibanabana nga gidak-ong usa ka kilometro nga diametro ang gidak-on ug ang hinungdan niini mao ang uneven distribution sa pressure ug temperatura.

Si Alviola midungag nga dili nila mabantayan kun dunay buhawi o alimpulos ang moigo sa usa ka lugar dinhi sa nasud tungod kay wala man silay himan pag-ila niini.